Tuesday, November 12, 2019

 

TAMPULON AEK DO NA MARHAHA MARANGGI

 

Mansai uli serita on pahusor-husoronta…

Disada huta adong ma sada SUMUR na binahen ni Halak Bolanda najolo. Ia sumur on nunga gabe parjenggetan (keramat) di hutai. Hape najolo sian on do mual dipangke huta na adong di humaliang ni sumur i.

Didok Parjenggetan (keramat) dung adong ma jolma naeng manimba aek, tali dohot ember ni panimbai sai ditogu sian toru, sampe godang do ember dohot talina lonong di sumuri.

Nunga tung mansai leleng dang adong mamboto ala ni aha asa songoni. Alani do angka jolma namarhuta di humaliang ni sumuri mandok adong MANGINGANI GABE PARBEGUAN.

 

Disada tingki masa ma halian potir (kemarau berkepanjangan) Hape najolo andorang so masa mago timba di sumur i sai sian i do mual ala so olo mahiang tung pe halion potir namarimpot-impot.

Marrunggu ma angka natua-tua dht raja adat mangalului aha do namasa di inganan ni muali. Jala sotolop ma nasida asa adong ma tuat hu bagas sumur na gabe parjenggetan i.

 

Alai dang adong nabarani dinalaho mamareso tu bagasan sumur i ala ni biarna be. Alai adong ma sahalak doli-doli  mangkabaranihon dirina mangulahon pangidoan ni natorop i. Dohot siarat hahana na dibariba ni hutai ingkon dohot maniop tali i molo jadi tuat ibana.

Hape diboto parhutai do namarbadai do doli-doli dohot hahanai ala ni pambagian arta ni among ni nasida.Pola do marsipisoan namarhahamaranggi i ala ni posa ni badai.

 

Situan na torop marsisungkunan:”Boasa ingkon hahanai ala marabadai do nasida hape torop do angka naposo dht angka ama-ama nagogo naboi maniop tali i.

Alai doli-doli i mandok ingkon dohot do hahanai. Ala dang adong na barani tuat tu sumur i, mardos ni roha ma nasida laho mangelek hahanai asa olo maniop tali i. Ditingki dipasahat tu hahanai pangidoan ni anggina i, parjolo dang olo hahanai. Alai ala sai dielek angka natorop i ma hahana i, dang tarjuasa be.

 

Dungi dohot ma Hahanai maniop tali i, jala nasida pe dang dope marsipangkulingan ala ni posa ni parbadaan ni namarhaha maranggi i. Dung dibereng anggina i na dohot do hahana i maniop tali pintor barani ma ibana tuat tu sumuri. Dung diingkat gonting ni doli-doli dohot tali nanganjang tuat ma ibana nanget-nanget mangihuthon tu toru. Mansai torop do jolma maniop tali jala dohot do haha nai.

Ngorngor do tali i patuathon doli-doli sahat tu bona ni sumur i. Sude do paimahon aha do namasa di toru. Di bagasan sumur i dijumpa doli-doli i ma sada herek di ginjang ni sada batu nabalga.

“On ma sibikkasi ni namasa on” ninna roha ni doli-doli dibagas rohana. Dungi digora ibana ma asa ditogu tali i. Laos diabing jala diboan ma herek i sian toru ni sumuri. Dung dibege situan na torop jou-jou sian bagas ni sumur i pintor rampak ma nasida manogu tali i.

Mandapothon topi ni sumur i, pintor manjakit ma herek i marhite tali ala las ni rohana mamereng hatiuron pintor mangalumpat sian abingan ni doli-doli i, laos manjangkit marhite-hite tali.

Ala parjolo kaluar herek sian sumur i pintor humarambur ma angka natorop i ala ni biarna mamereng herek na kaluar i jala di palua be ma tali sian tangana. Dirimpu nasida do doli-doli i nunga gabe herek dibahen pangingani ni sumur parbeguan i.

 

Sude do marambuaran alai tinggal do hahanai maniop tali i. Sampe malaklak do tangani hahanai maniop tali i asa unang madabu angginai tu bona ni sumur i. Sian sude gogona ditogu ibana sandiri do angginai sian sumur i.Dung ditogu hahanai angginai tu ginjang marsihaolan ma nasida rap tangis, baru pe ro muse situan na torop majonoki nasida.

Baru pe diantusi situan na torop i boasa ingkon sai margogo doli-doli i naingkon dohot hahanai maniop tali i. Molo so disi hahanai nunga madabu ibana tu toru jala olo do mate ala ni bagas ni sumur i.

Mulai sian i lam jonok ma muse namarhaha maranggi i. Marhite i boi ma dipakke muse mual na adong di sumur i. Las ma rohani par huta na adong di haliang ni sumur i.

 

IMPOLA NI SERITA I:

Hahanggi dohot pinaribot na sarurutan do naboi sihaporsean na rade mangurupi ditingki las ni roha tarlumobi ma di dok ni roha.

Molo adong marsalisi angka namarhaha maranggi dohot namariboto diingot ma serita on asa tubu roha namangkuling laho dame.

 

*DENGGAN JALA ULI MOLO RAP SAHUNDULAN NAMARHAHA MARANGGI *

INGKON SADA DO SONGON DAI NI AEK, UNANG MARDUA SONGON DAI NI TUAK

MASIAMIN-AMINAN SONGON LAMPAK NI GAOL

MASITUNGKOL-TUNGKOLAN SONGON SUHAT DI ROBEAN.

 

H o r a s  m a…!!!.

Arti dari kata – kata bahasa Batak ‘ Tampulon aek do na marhaha-maranggi ‘ memiliki arti yakni

Secara harafiah : Bersaudara kakak beradik adalah ibarat air ditebas.

Artinya : Air bila ditebas akan segera menyatu, seperti itulah bersaudara semarga yang berselisih atau bertengkar sebaiknya seperti air itu segera pula menyatu atau berdamai.

 

 

Comments

No comments found!

Leave a Comment

Your email address will not be published.

Tentang Website Kami

Website PSSSIB.org ini didedikasikan untuk seluruh warga Batak dengan marga Simanjuntak yang merupakan keturunan Raja Marsundung Simanjuntak dan bersatu dalam Parsadaan Simanjuntak Sitolu Sada Ina beserta seluruh Borunya.

Website ini adalah media komunikasi, edukasi dan interaksi seluruh anggota Parsadaan dengan tujuan meningkatkan rasa kasih & persaudaraan di semua keluarga besar Parsadaan Simanjuntak Sitolu Sada Ina & Boruna se Jakarta & Sekitarnya

Login
Remember me
Lost your Password?
Password Reset
Login